好緊張

早幾日訂左機票喇! 仲有一個月就返香港睇草蜢演唱會, 心情好緊張!!! (>_<") 不經不覺, 已經"十扑"左草蜢成十九幾年. 仲記得由佢地唱烈火快車開始已經好鍾意! 儲埋零用錢就係買餅帶黎聽, 同埋睇佢地既mini concert. 仲有果陣時差不多隔期一百分或者大眾偶像都係佢地做封面, 年中都洗唔少錢買呢d雜誌. 還好大家都知我係一個草蜢迷, 好多時候其他同學仔見到報紙有佢地都會剪低留俾我. 親筆簽名相和合照真係數都數唔晒! 我有好多簽名相同十蚊紙都唔知去左邊喇. 剛啱搵番個"士驚拿"出黎, 梗係要digitize返晒d珍藏啦! 從來未公開過. 大大話話都有十四年喇呢幾張相...







呢d相出面買唔到架. 當年都唔明點會夠膽約草蜢出黎"做訪問", 然後當然要同佢地影返輯"沙龍"啦!
下面呢張相先至係至珍貴. 我其實都唔記得曾經同阿梅影過相. 呢日係蘇志威蘇老闆佢間唱片鋪新開張剪綵時影既. 當年點解我地可以"鼠"到入去我都已經唔係好記得清楚. 只係記得其他fan屎流晒口水咁望住樓上鋪頭入面所有既明星歌星, 而我地就好輕鬆咁晌入面同佢地影相. 最重要既係呢日係我移民上機前三日. 呢一次亦係我最後一次見到佢地真人. 都已經十三年幾喇, 心情當然係極到十分極到緊張啦! 呵呵...